رسالة إلى والدي بقلم رضا ابوالغيط
انا قلبي لسه حزين
من يوم ما رحت هناك
ودموعي مالية العين
وعيوني ع الشباك
بتطل على المخاليق
م الصبح لأخر الليل
يمكن ف وقت الضيق
تلمح عينيك يا أصيل
بتقولي – مش هنساك
مهما بعدت بعيد
وهكون تملي معاك
ف العيد وغير العيد
م انت الوريث……..
ياوحيد
الأهل والأحباب
وانت اللى هتكون دار
مفتوحة ليل ونهار
للعيلة والأصحاب
وانت اللي قلت زمان
وانا ف الكفن ملفوف
لو حد كان له دين
عند اللي فاتنا وراح
هيخده مني تمام
م القلب قبل العين
كان نفسي يا أبا تعيش
وتشوفني م الناجحين
وان قلت يوم ماعييش
تفتح ايديك لتنين
وتقولي سد الشيش
وأمسح دموع العين
من يوم ما رحت هناك
وانا لسة ياابا حزين
والقلب والأفراح
تملي متخاصمين
طول النهار سواح
وسط الرياح والطين
وف عز صمت الليل
بااصرخ على الغايبين
وبقول يارب ارتاح
وأريح الغاليين
من يوم ما رحت هناك
وقلت هستناك
وانا والعذاب أصحاب
إن قلت همشي معاك
يقفل ف وشي الباب
ويقولي – رايح فين
خليك حزين – يا حزين
التعليقات مغلقة.