ركز في عملك …كلمات حاتم محمد الغيطاني…زفتى محافظة الغربية
كفاية هيصة وطرقعة
كفاية تصوير فرقعة
عايزين نركز في العمل
عايزين نحقق في الأمل
هو إحنا معبدنا الصور
واللا الصور اتحولت
واتكونت منها المزارع والمدارس
والمصانع والورش
إحنا زهقنا من الفرش
اللي بترسم
من غير ما تحسم
و اللقطة باتت عندها هي الأمل
هي العمل
هي اللي تثبت حلمنا
مرسوم بيبرق
فوق الورق
مش في الحقيقة و بالعرق
زي الطيور قبل الفلق
لما تقوم تسعى
وترجع مرهقة
وهي جاية مرزقة
مش على الورق
تنتش وتجري
و اللقطة تكفي
والصورة تغني
من غير ماتبني
كفاية هيصة وطرقعة
كفاية تصوير فرقعة
عاوزين نكون في المعمعة
عمال بتبني
فلاح بيجني
طلاب بتحني
ظهرها على علمها
على حلمها
ترفع بلادها في السما
بين النجوم
تمحي الغيوم
اللي تراكمت من الصور
والجري على أهداف الكور
من غير ما تدخل معمعة
من غير تعمل منفعة
كفاية هيصة وطرقعة
كفاية تصوير فرقعة
حتى اللي رايح يوم يطوف
رايح يصور الحرم
هو أنت رايح للعبادة
واللا رحلة للهرم
دا أنت دماغك اتخرم
واللا اللي دابح له خروف
رايح يصور الألم
على وش واحد اتحرم
رايح بيشحت لحمته
تقوم تصور زحمته
عشان توثق رحمتك
وهو واخد لحمتك
خابت خبيتها في خلفتك
و يا ريت ما شفنا خلقتك
كفاية هيصة وطرقعة
كفاية تصوير فرقعة
زفتى محافظة الغربية
التعليقات مغلقة.