رهين الكفن….
تهاني بركات
رهين الكفن….
كلمني ع المكتوب
و امسح دموع الندم
و ايه يفيد اللوم
لما الجراح تحتدم
تاهت منا الدروب
و قلوبنا لبست كفن
بنعيش وسط الموت
و نعمل نفسنا راضيين
حتى شجر التوت
طرحه ثمر معطوب
و كأن أرضه ارتوت
بذنوب الحاسدين
و إن تابت خطاوينا
و سبنا البكا و النوح
و فردنا فوق الجروح
نسمة عصاري و شوية فرح
و نسينا مين باع و مين جرح
تقاضينا أيامنا
و تنصب لنا المحكمة
أشباح صوركم متمردة
سبت نفسك ويا جرحك
و هربت جوه الشرنقة
و العنكبوت ناسج
خيوطه بحرفنة
ممنوع تغير جلدك
أو تطلع بره المصيدة
أصلك رهين من كام سنة
شاهدة عقارب الزمن
على الوشوش
بالدليل و المستند
اقفل كتابك
خليك في حالك
انسى الورق
كل البيبان متقفلة
حتى الطرق
بين الحروف صابها الغرق
و إن لبس قلبك خضار
هيفضل رهين جوه الكفن
تهاني بركات ٢٢ / ٥ / ٢٠٢٢
التعليقات مغلقة.