روايح الزمن البسيط …
أسماء البيطار
زمان اللي مش من بعيد قوي ما كنش فيه بيت من بيوت الأجداد يخلو من الفرن البلدي فوق سطح البيت الكبير بيت العيلة
بيت الدفي بيت اللمة الجميلة بيت الطيبين اللي بيجمع القُريب و البعيد على الحُب و البساطة .
كنا بنبقي فرحانين جداً لما نعرف إن جدتي هتخبز كنا نصلي الفجر و نقوم عندنا نشاط عجيب الكل بيحضر للقاعدة الجميلة و دفاها و شغلها اللي الكل لازم يبقى في ايده لخمة العجين .
كان الفرن من اهميته ليه اوضة مخصوصه طله على باقي السطح
تقعد جدتي و إحنا حواليها
و طبعاً واخدين معنا فطارنا و براد الشاي اللي كان بيدخل الفرن
بنستني العيش لما يطلع اللي كان بيقلب ريحة البيت و المكان
كانت القاعدة لوحدها ترد الروح كنا فعلاً بنبقي مبسوطين كنا حاسين بالسعادة اللي طالعة من القلب .
كنا بنضحك ضحكة صافية رغم إن المجهود كان اكبر من الأيام اللي إحنا فيها دي اللي كل حاجة فيها بالكهربا حتى الشاي عدمنا طعمة .
بحن لأيام جدتي اللي كلها كانت خير و بركة و سعادة
و بحكي لولادي عنها اللي ما يعرفوش حتى شكل الفرن
ساعات بحس اننا كنا جيل محظوظ لأن في ذكرى جميلة عايشين عليها لحد دلوقتي رغم بساطتها
صحيح بنعمل اللي نقدر عليها للولاد بس اكيد مش هييجي زي زمان .
التعليقات مغلقة.