زووم.بقلم: على يحيى

وهاخطف منك اللقطة
وهاعمل زووم
شعوبنا لسه في اللفة
يادوب ترضع تروح في النوم
فهيص يا شيطان بقى وبرطع
وبيع الغيط مع المصنع
مع البقرة وكام ترعة وكام مطلع
وعيشلك ألف ليلة ويوم
وبيع مسافات وبيع أوقات
ما بين الواتس ويا الشات
كتير غرقى كتير أموات
وتعلب مال على الدنيا وعبى وفات
ياليل حكايات ومواله إللي دايم دوم
لضمت الخيط عشان أوصل لبر أمان لقيت سجان لقيت بركان
وجيت أخرج من التوهة فتوهت كمان
وحتى الغنوة ألحانها شجن أحزان
وجرح كمان ..
وحروفها بتغرق ليه في بحر اللوم
ما فيش أعشاش على الشجرة
وما فيش عصافير
وليل الحوت مالوش قمرة
وملان دبابير
وحلمي جناحه ليه حاير
تملي أسير
وليه الهم كان حبة وصار بالكوم.