زي مينا…سامح لطف الله
اللي عفّر يوم في وشك
واللي نفض لك جيوب
واللي ينهش نيّ لحمك
علّى كومه بالذنوب
واللي ناكر كل خيرك
لو ينام ف حضن غيرك
ييجي راكع للتراب
كل ذرة وليها دين
إقبليه يمكن يتوب
اللي تاه منه الخطاوي
جوة أرضك والدروب
واللي عاش يجري ف حياته
وهيه لقمة يطول يا دوب
افتحيله الباب لخيرك
دوقيه قبل الغروب
كل دنيا وفيها فيها
زي مينا وحديها
لمي ناسك جوة حضنك
م الشمال حتى الجنوب
اوعي ترمي ضناكي يامه
لمي لحمك في القلوب
التعليقات مغلقة.