سؤال غريب بقلم..مدحت رياض
أغرب سؤال مريت عليه
وقت اما تنزل دمعتك
بتحس إيه ؟؟
وجوابي أغرب م السؤال
اللي انت عاوز تبتديه
بتحس قلبك دق فيه
مليون وتد
والفرح محكوم يندفن
من قبل حتى ما يتولد
والمشنقة متعلقة
للضحك لو فكر يجيك
ورموش عينيك
تسهر تخاصم بعضها
بتحس روحك وقتها
خرجت وغابت ولا شابت
ولا شافت ناي بيبكي
وحدها مالت عليه
وقت أما تنزل دمعتك
بتحس إيه؟
بتحس نفسك في الهوا
لكن غريق
وتحس كل فراغ بدأ
عمال يضيق
وتتوه عيونك ع الطريق
وسؤال ملوش أصلا جواب
ازاي وليه ؟؟
وقت أما تنزل دمعتك
بتحس إيه؟؟
التعليقات مغلقة.