ساقية. بقلم نصر سرحان طاحون
اهداء الى روح الدكتور الصيدلي /أحمد حاتم والذي قُتل غدرا في السعودية
كمَّا الساقية بالف وادور
باحاول انِّي يوم أوصل
لكن بأرجع لنفس الدور
تشوفني الناس وانا داير
علي نفسي كمَّا المسحور
يقولوا بس ايه صابك ؟؟
ووسط الدايرة ليه محشور؟
باقول بأحلم أكون عايش
وبأعند…. بس مش مغرور
بدأت الدايرة متغرَّب
ومتشعلق كمَّا العصفور
ولفة وتانية بتاخدني
وأنا فاكر بقيت مشهور
وتيجي التالتة تحدفني
وترميني في بير مهجور
وألاقي الضلمة فيه كاسية
وأنا وحدي حزين مأسور
حاولت ف مرة أتمرد
علي نفسي وأهج وأثور
فِضِلْت اصرخ… ومين يسمع
لصوت واحد ضعيف مكسور
لقيت كرباج بيلسعني
وساب جسمي كتاب مسطور
بيحكي حكاية عن حلمي
وعن أملي.. إن أكون مجبور
ووسط الحلم كان شمعة
وكام نجمة.. وطاقة نور
بافَتَّح عيني وأتأمل
وألاقي اسمي هناك محفور
دا نفس الاسم هو اسمي
علي شاهد ف وسط قبور
وناس رايحة وناس جاية
بتدعيلي أكون مغفور
يقولوا بس كان طيب
وكان عاشق وكان دكتور
التعليقات مغلقة.