سبيل الورد بقلم بهاء اللبودى

مش مستني أنا منك حاجة
أو بتمنى نعيش تفاصيل

فوقي يا وردة من الغيبوبة
كان من إمتى العقل عويل

مُش مطلوب م الورد يا سادة
يحزن لما الدنيا تميل

أو يتنطط ع السجادة
فزعا لما الدم يسيل
..
مش مطلوب غير زي العادة
طبعاً يفضل بس جميل

ينشر عطره بكل هواده
على كم قلب حزين وعليل

نشكر ربنا لما نشوفُه
ونقدمله الطاعة دليل

على إخلاصنا بجد وخوفُه
على نعماؤه بصبح وليل

أما الورد يدوب دا سبيل

نحمي الزرع ونروي جدوره
نُذكر رب كريم و جليل

شاهدين خيره العمر بحالُه
رزق الطير والدود والخيل

خلق الكون دا بكل جمالُه
وحده القادر ع التبديل
….
وميمنعش القلب تصيبُه
بعض الفتنة وبعض الويل

علشان يفهم كل عيوبه
ويعدلها بدون تأجيل

علشان يقدر ينقذ روحه
ويسلمها بقلب أصيل

أما الورد يدوب دا سبيل