ست الحسن…بقلم الشاعر المصري أحمد إبراهيم النجار
حلمك وحلمي
كان بداية نور
بس الزمن قاسي
رافض لأحلمنا
سكنت ليالي
فيها عتمة وبور
طال الألم ساكن
ساكن في أيامنا
كنتي عروس الشرق
بس الأمل مهدور
مكياج على خدك
فى كفوفك الحنه
يا لابسة تاج المجد
بس تاج مكسور
والقلب نبضه حزين
ماشيه وف الزفه
في عينيكي دمع بحور
متسلسه حافيه
توبك قديم ملموم
ماشية وبالعافيه
والخطوة فيها هموم
كل العيون شايفه
فيها عيون العور
وقلوبها دي عميه
لما يطول الليل
فى عيونك النايّمه
يغرب شروق الشمس
وتسكني ف دايرة
مالهاش في يومها خروج
رعشة جسد خايفه
لو هو ده المكتوب
تعيشي ف الغربه
رافض أشوف دمعتك
نزله مع الصرخة
واه من الأيام
رفضه ما تسمعنا
فيها معاني الزور
مايله مع الرقصه
واقفين فى درب طبور
وبيرقصوا بغنوة
ونوعها مهرجانات
ولا لون ولا معني
فيها الجنون ألوان
وعقول ومش عاقله
يا دنيا فيكي العجب
درب النفاق جنة
والحق فيكي اتعدم
مالهوش وجود بنّا
واه من المكتوب
واه من المسلوب
واه من المسروق
من عمرنا جمله
واه عليكي حبيبتي
من غدر دي الأيام
سكنك غيوم وظلام
وساعات بدون معني
فيها ليالي طوال
برقص مية طبال
فوق الرصيف أطفال
صرخة مع الدمعه
امتي يعود نورك
ويرحل بقا ليلك
امتي هيشرق أمل
ساكن على جبينك
امتي هيرحل زمن
يرجع زمن عيدك
امتي اعيش الحب
والمس انا إيدك
وحشاني ست الحسن
يا اميرة من يومك
نفسي اشوف الفرح
ساكن هنا عيونك
عاشق حنين حضنك
عاشق انا نورك
عشقك يا ست الحسن
يا اميرة من يومك
بقلم الشاعر المصري
أحمد إبراهيم النجار
التعليقات مغلقة.