سجال قبلي وبحري في فن الموال بين المبدعة فاطمة على و.. معوض حلمي شاعر عامية

سجال قبلي وبحري في فن الموال بين المبدعة فاطمة على و.. معوض حلمي شاعر عامية

فاطمة علي

ولا حبوا بعض الضراير ولا نخلة طلعها جمال
ولا شوفنا مرة أسد بيخاف من الأهوال
فإياك تقول أنا جدع و أنت عويل دلدول
ده الراجل المعدول ما بتكسروش أحمال
ـــــــــــــــــــــــــــــــــــــــــــــــــــــــــــــــ
معوض حلمي الفلاح الفصيح

صاحب أصيل البلد ماهوش شغت وعويل
لو مال بيفضل سند حقيقه مش تأويل
دا الأصل باقي ومدد مهما الزمن بيميل
أنا شوفت مره عويل مال للمره واتهز
عاش في بيتها ذليل عشان فلوسها اتهز
بعد أما كان عنتيل رقرق وديله اتهز
الصبح يعلف وز ويغسل هدوم بالليل
ـــــــــــــــــــــــــــــــــــــــــــــــــــــــــــــــ
فاطمة علي

مسـكين يا ضل المرا ولا كلمـة ولا حيلة
و السـت دايـرة بغشـم بترازى ف العـيلة
سايب الكلاب تهنشك و أنت فى تغفيـلة
سيرتك لبان يتندغ على طول بدون اسباب
حتى العويل يركبـك و النـطع و الكذاب
ميت عايشـها وحيد ولا اهـل ولا أحباب
قفلـت عليـك الباب حظـك صحيح نيلة
ـــــــــــــــــــــــــــــــــــــــــــــــــــــــــــــــ
معوض حلمي الفلاح الفصيح

طوع المـره بقى مره وإياك تصـاحبه
راح يشبـعوك نأوره لو تبـقى صـاحبه
هاتبقى زوعة البلد ويجـرجروك جرجـره
دا اللي تسـوقه المـره راح يقضي نحبه
ـــــــــــــــــــــــــــــــــــــــــــــــــــــــــــــــ
فاطمة علي

عارفيـنه جـوز السـت عايم على عومها
سـايب لجـامـها النى ولا مـرة بيـلومـها
و عشان قليل مرجلة بيقول كلامها زين
و يبــــات كسير العين بالع مرار شـومها
ـــــــــــــــــــــــــــــــــــــــــــــــــــــــــــــــ
معوض حلمي الفلاح الفصيح

مش قولت لك ياعويل مال المره بيذل
فـردت طـولك ميل وقـولت لي م الغـل
طـب ليه رجـعـت ذلـيل ودمعـتك بتهل
انا كنت واخدك خل ونصيحتي كات لله
رميت طراوة الضل ورضيت بحر الآآآآه
جـرح المــره بيـعل حـاروا الأطـبا معاه
فا ليه تعـيش آواه وتسـيب لجامـها يحل
ـــــــــــــــــــــــــــــــــــــــــــــــــــــــــــــــ