سجال مشترك بين معوض حلمي و ناهد الموجي ” كحل عينيها يتعاجب “
قال الفلاح الفصيح
معوض حلمي شاعر عامية
هذا سجال مشترك بين الشاعر معوض حلمي شاعر العامية و الشاعرة ناهد الموجي
( كحل عينيها يتعاجب )
أنا التايه دليلي إحتار
لما قالتلي ياواد اختار
مابين قلبي وبين روحك
لقيت قلبي وقايد نار …
وانا قلبي مدار لأحلامها
سكنها وضل أيامها
والروح تفديها لو تعرف
واضحي بعمري علشانها …
وحبيبتي ف كل أحوالها
مابين الغيره وظنونها
ظلماني ليه ودبحاني
وقايدة النار بأوهامها …
وانا العاشق لأوصافها
وقلبي يحن لو شافها
ويرفع رايته ويسلم
عشان تهديني أشواقها …
وحالنا يروق ونتهنى
واحني إيديها بالحنه
وكحل عينيها يتعاجب
واشوفها حوريه م الجنه …
وأتمنى تلاغيني ملاغيه
وتبقى حمامة الغيه
واكون طيرها واغنيلها
واصونها بروحي وعنيا …
ويهدى البال ونتعاهد
على الإخلاص ونتواعد
وانا عاقد النيه
نكون واحد مانتباعد …
ردت المبدعة المتالقة
ناهد الموجي
وليه تايه وليه محتار ؟
مادام قلبك خلاص اختار
يكون لي المينا والمركب
وجمب الساري يبقى فنار
…….
انا الساكنة ف شرايينك
ما فيش مني هروب فرار
انا النايمة ف بياض عينك
صدر بوجودي فيها قرار
…………
اغير ممكن ما فيش مانع
ويتحول غرامي لنار
ارش الحيرة ف الشارع
واصعب ع الغريب والجار
……..
وكلمة حلوة تحكيها
ترجعني شذا الازهار
وروحي لما تحويها
ما يبقاش عندي نار وشرار
………..
تعالى انا وانت نتعاهد
ما فيش بينا خفي واسرار
على عهدي الاله شاهد
وعهدك ليا عمره ما جار
التعليقات مغلقة.