سجال مشترك بين ناهد الموجي و معوض حلمي
قالت المبدعة ناهد الموجي :إرجعلي من تاني
قلبك براح مخملي
من مفردي لمُجملي
ساكن ضيا عيني
ريداك يا سيدنا الولي
رامية عليك محملي
افتحلي تحيييني
قلبي انا المبتلى
انت اللي قلبك خلي
من شهدك ارويني
سايقة عليك النبي
حققلي انا مطلبي
عطشانة تسقيني
افتح وشوف الشجر
بيحدفوه بالحجر
عصفوره م الخوف
هجر
خايفة يحين حيني
طرح الشجر برقوق
كان نفسي منه تدوق
روحك هتصفى تروق
ويروح بعيد الشوق
عن قلبي انا الحاني
طرح الشجر رمان
حبه دوا النسيان
بيصالح الخلان
والبعد نساني
طرح الشجر تفاح
سكر بداوي جراح
بطرح ف كل صباح
وحلاوته رباني
عنب الشجر الوان
وانت اللي كنت زمان
زارعه هنا عشاني
باحلفك بالله
بعزته وسماه
ترجعلي من تاني
………………………..
قال الفلاح الفصيح معوض حلمي شاعر عامية :إحساس القرب
ماحناش في الحب ياناس اتنين
ولا كنا عينين بتبص لبعض
دوبنا حنين ودموع وأنين
إحساس القرب يشدنا شد
واهو عدى الحد
وقلبي الطيب سهاني
راح يسأل على نصه التاني
علشان يرضيه /مشتاق لعينيه
وانا ليك أشواقي بتغلبني
وتنام في عيوني وف النني
وأنام في عينيك يامجنني
وإزاي قادرين
شياطين الجان ياخدوك مني
دول عارفيني بحبك موت
وأموت لو غيرك يشغلني
واستني تفوت والنور حواليك
وأنادي عليك ، فترد آمين
وافرش لك كل سنيني حنين
يناديني هواك مطرح ماتكون
وأطير وياك لحدود الكون
ونكون حبيبين وهوانا هيام
وإن مال الهوا في عيونك نام
أنا هابقى حمام وابني لك عشي
بقشه محبه ، وقشه غرام
وافتح لك قلبي الأخضر
لاجل ماتمشي وتتمختر
على عيني ورمشي
وتجيني هناك
وارجع بالذكرى فلاش باك
لهنايا معاك
والآقيك طاير بتقرب
بجناح من ريش
بتطمن قلبي وبتطبطب
تداوي لي الآآآآآه
ويمد شعاع الحب مداااااااه
يااااااااااه
يحلالي الحلم واكون وياك
واسرح في عينيك لمشاء الله
التعليقات مغلقة.