سنة أولى حب … بقلم وحيد علي الجمال

هو عشان اتوجع
من كلمة و لا اثنين
و سهر له كام ليله
يتقلب على الجانبين
ضرب دموع الودع
مع قلب فيه سهمين
و كأنه فجأة اتفجع
زلزل دموع العين
شاف جرحه لما نزف
فعمله هو ليله
مليش أنا في الدلع
و شويه الحركات
الحب طابعه كده
جنة في قلب النار
الحب آخر معجزة
ماتت بدون كرامات
المر شوفته زمان
مش ناوي أقلب فيه
و لا أعيش في هم و بكا
و أحسب حساب اللقاء
من حر جو الصيف
لبرد ليل الشتا
صفي الحساب بينا
احنا كدا خالصين
و اتفضت الشيله
و الكل قال راضيين
درويشه قام اتفزع
مع جملة العفاريت
رفض الحكايه كدا
و نعيش بقى حلوين
أنا لسه ليّه عوض
عن كل دمعة عين
كشفت له قلبي
كام جرح فيه ساكنين
فضل يناجي القمر
ويسرسب الدمعات
نزلت دموع السما
وكأنه له كرامات
شرب سطور الفرح
عاشت معاه لحظات
ردد معاه المدد
كتب حروفه بغشم
و أنت اللي بعد العشم
هتجمع الدعوات
حكموا عليه يرتجل
سلم عليها و مات
لما ساقوه الحب
و الجرح كان كداب
من أمته كان الحب
من غير وجع يتحب
من امته كان الحب
مطلوب معاه ضمانات
معقود في أول سطر
لفه بسبع لفات
تعويذه رابطه الفصل
متحنّي جوه الخط
أربع خمس كلمات
اقرا الحروف بالعكس
علم بها المسافات
ارفع علامة النصر
رص بقى الدمغات
و أنت ياعم الحظ
عيب عليك اختشي
خلي عندك دم
امته هتيجي بقى
و السعد يبقى لقا
و اقتل سنين الشقا
ندرا عليه يا حظ
يا صاحب الكرامات
إذا شوفت ضلك هنا
لأدبح سبع وزات