سن الرشد يبدأ من هنا ….
بـ قلمي/ أسـمـاء الـبـيـطـار
طلعت البطاقة الشخصية ، اخدت رخصة السواقة ، اخدت ميراثك ، خلصت الجامعة و دخلت الجيش .
كل دا بيثبت إنك بقيت مؤهل إنك تكون على أول درجات المسئولية
الشخصية .
لكن سن الرشد الحقيقي يبدأ من فترة الخطوبة ، الفترة اللي حقيقي محتاجين فيها رشد في التفكير و تأني في الإختيار
و الإختبار الحقيقي لنضج و رشد النفس يبدأ من هذه الفترة الحاسمة في الجزء الأهم من عُمرنا
لان حقيقي نسب الطلاق في الدول العربية مش في مصر بس بقت تخوف .
فترة الخطوبة مش فترة ” زواق ” و تغيير جلود ووشوش .
مش فترة ” رسم ” و تباهي .
دي فترة تحديد مصير ، هنقدر نكمل ولّا كل واحد فينا يروح لحاله .
ندخل في موضوعنا ..
أكيد كل واحد فينا فيه عيوب ، و في عيوب بتبان من أول تعامل ما بالك لو قعدت سنة أو سنتين في فترة التعارف أو الخطوبة دي .
لكن مشكلتنا إننا بنهون الأمور علشان عاوزين نكمل و خلاص ؟!
نكمل رغم كل العيوب اللي بانت قدامنا من الطرفين على فكرة .
نكمل و خلاص علشان ما يصحش نسيب بعض بعد الفترة دي كلها ؟!
نكمل و خلاص علشان كلام الناس ؟!
نكمل و خلاص علشان ماما قالت سنك كبر ؟!
نكمل و خلاص و بكره يتغيير أو تتغيير ؟!
و بنفضل نكمل على نفسنا للأسف لحد ما الأمر بيوصل لمرحلة صعب إننا ناخد و ندي فيها .
و بيكون القرار وقتها نهائي ؟!
و هو الإنفصال بعد شهر أو سنة من الزواج مش هتفرق كتير ؟!
و كل دا علشان دوسنا على نفسنا و تحملنا سلوكيات أو طباع
إشتكينا منها مرة و إتنين و تلاته و للأسف لقينا اللي بيهون و يضغط و يمكن يكون الضغط من نفسنا على نفسنا تحت أي مسمى ؟!
و النتيجة للأسف ” صفر ” و هو نتيجة حتمية للعند مع النفس .
كتير مشكلتنا بتبقى مع نفسنا .
و الأمر حقيقي بسيط و بسيط جداً و هو إنك تكون ناضج بالقدر الكافي و تشوف نفسك هتقدر تتحمل و لّا نفضها سيرة و بلاها شحططة في المحاكم و إحنا لسه في عز شبابنا !
الإنسان اللي هتبدأ معاه حياة ” جديدة ” لو مش هيخليك تنور في فترة الخطوبة .
صدقني هتفضل مطفي .
و حقيقي البيوت ما بقتش ناقصة و لا متحمله .
التعليقات مغلقة.