سوق الصحاب انضرب بقلم هنا سعد
صديقتى، يعنى أنا ..
اختارتها بنفسى
يوم م احس بوجع
بوجعي بتحسي
ومهما عمرى قِسي
عليا ما بتقْسي
،،،،،،،،،،،،،،،،،،،،،،،،،،،،
صدرى بسري يضيق
وصدرك انتى براح
الكون عليا خنيق
واجيلك انتى ارتاح
بتمسحى دمعتى
وارجع ما فيّا جراح
،،،،،،،،،،،،،،،،،،،،،،،،،،،
دافعتى عنى كتير
قسمنا لقمتنا
ساعة الحضور
فى الصف
خطوتنا سبقتنا
نجحنا أخر السنة
فرحتنا جمعتنا
و إن ضاق ف يوم الحال
يوسع بلمتنا
،،،،،،،،،،،،،،،،،،،،،،،،،،،،،،،
ف عز حر هجير
والشمس قلاية
حجبتى عين الشمس
وعملتى ضلاية
بطرف كم هدومك
مسحتى لى جبينى
وبورقة من شنطتك
عملتى هواية
رقدتى يومها عيا
وقلتى انا فداكى
ما يمِسّك يوم الوجع
وتفضلى معايا
،،،،،،،،،،،،،،،،،،،،،،،.
سوق الصحاب انضرب
واتبدلت لاحوال
والصدق لما أتغلب
صار النفاق خيّال
يا سوق وماله كبير
والقرش فيك ينشال
ف قلوب وفوق الراس
يتقال له ١٠٠ موال
،،،،،،،،،،،،،،،،،،،،،،،،،،،،،،،،،،،
صديقتي ساكنة الروح
ف ضلوعى ووريدى
بلاش تقيدى النار
ف قلبى وتكيدى
وظيفة عال العال
والقرش ده سِيدي
ياروح ما بعدك روح
وتخنقك ايدى
ايه يعنى صاحبه تروح
يا دنيتى زيدى
،،،،،،،،،،،،،،،،،،،،،،،،،،،،،،،،،،،
فكرتى قبل الغدر
هتعيشى كِيف ألمي ؟!
اكلتى من لحمى
وتشربى دمى
كنا زمان اصحاب
لأ..قولى كنا اخوات
لما الغريب خضنى
جريتى جبتى أمى
شهدتى كلمة حق
ان الغريب غدار
ازاى مكان جنتى
بتزرعى الاشرار
كنتى زمان الدوا
بقيتى ليه سِمّي
التعليقات مغلقة.