سوق النكد…قصيده بالعاميه المصريه بقلم وحيد على الجمال
تعرفش سوق للنكد
افرش وابيع بدري
معايا منه عدد
كابس على صدري
حَمًِل وشيل ف الشُنط
اوعاك تخيب زيي
فيه نوع بقى معتبر
حارق كتير دمي
ميعاده آه ف الشتا
شعلل نيران قلبي
فرصه تعالىٰ اخدمك
من غير فلوس عبي
ييجي بلا داعي
ساكن خيال ضلي
لو ضحكه من غير سبب
يلبد هنا ف خدي
تبويزتُه زي الوتد
قاطع حبال قلبي
بيهز أجدع شنب
ويجنن الجني
ويخلي ساعة الصفا
أسوأ ساعات عمري
والحظ لو يخدمك
تلقى كبير النكد
يدخل معاك شقتك
ويعفرتك بدري
تلقى الصراخ اشتغل
والواد بيقلب شقي
والبنت بتغني
وسط البكا والشقىٰ
تسمع دبيب همسي
افتح موبايلك بقى
اوعاك كدا تخبي
عرَّفني مين كلمك
افرد بقى شاتك
مش عارفه ايه غَيَّرك
بدِّلت في سُكاتك
والشعر أصبح مرض
ساكن على بابك
حالك معايا اتبدل
ولا تشبه اخواتك
ايه اللي كان زعلك
داء الهوى جالك
أكتب وقول في الهوى
انا في الهوى شالك
افتح موبايلك بقى
نفسي في أشعارك
وان قلت لأ وعَنَدت
يبقى السواد جالك
تقلب في لون خدها
تشرب كاسات الهم
وتعبي في سكاتك
الست هيه الست
غيرِتها مالها حد
لو انت جوه القبر
حد امتدح ذاتك
يركبها ألفين غم
تنسى أن حضن القبر
ضامم على رفاتك
وحيد علي الجمال
سرس الليان محافظة المنوفية جمهورية مصر العربية
التعليقات مغلقة.