سيبوا القميص…
رضا ابو شنب
سيبوا القميص ينزل علي عيني
يمكن حبيب العمر يرجعلي
كل اما اغمض عيني بيجيني
وبحس انه جاي يودعني
مكتوب عليا فوق علي جبيني
وان غاب عليا غيابه يوجعني
في القلب عايش جوه شرايني
ولا عمري اسيبه حتي لو بعني
عطشان ونفسي بايده يسقيني
وان دق قلبي الدنيا تسمعني
انا مهما شفت الدنيا تغريني
قدام عيونه الدنيا ماتسعني
بحلم اشوفه جاي يراضيني
واسمع كلامه وهو يسمعني
واديله قلبي وهو يديني
واحس قلبه جاي يمتعني
وبلمسة منه واحدة تحييني
وبنظرة منه يومها تنفعني
وان دق قلبي تشتكي عيني
وتقول كفايه الشوق يقطعني
كتر الدموع من حبه تاذيني
علشان بحبه الحب ضيعني
لو قال بحبك كلمة تشفيني
يرجعلي قلبي وهو يرجعلي
هو اللي من اصلي وتكويني
ازرع في قلبه وهو يزرعلي
ولا عمري افكر انه يرميني
وازاي احس بانه يخدعني
بدعي لرب الكون يخليني
يوم القيامة بقلبي يجمعني
كل اما اشوفه تشتهي عيني
ولا حد عنه يومها يمنعني
سيبوا القميص ينزل علي عيني
يمكن حبيب العمر يرجعلي
يمكن حبيب العمر يرجعلي
التعليقات مغلقة.