سيبى الأمل بقلم : أشرف الشناوي
فكى ايدى
من قيدك بقى
حلينى حبه
م الشقا
سيبى قلبى ينط
حبه فى الهوا
ويفرد جناحه
زى باقى الطير
فى احضان السما
خلى روحى تحس
حبة بحبحه
م المرجحه
خلينى اعيش
زى باقى الخلق
من غير اسئله
من غير جراح
من غير وجع
بيهزنى
زى انفجار القنبله
مش معضله
لو سيبتى قلبى
يعيش ساعات
او سيبتى ضحكه
تهز جدران السكات
او سيبتى حلم يعدى
وسط الذكريات
بس انتى
غاويه تعذبينى
فى اللى جى
زى اللى فات
فكى أيدى
من قيدك بقى
ياتزينى بالدم
حبل المشنقه
خلينى أرسم
اخر الاحلام كلام
خلينى اشوف
الصبح من جوا
الالام
خلينى اغنى غنوتى
يمكن الاقى فى عز
جرحك سكتى
يمكن انام
سيبى الأمل
يحضن الانوار ويعيش
ليه الوجع دايما
بيكبر من مفيش
ليه تحلفى انى
ماليش
غير بس جرح
ودمعتين
وان الحياه
لو عشتها مش
راح تكفى لأى دين
هزى الوجع
يمكن الاقى فى دنيتى
لو ضحكتين
يوم ينفعوا لما
اتحنى
لو عكازين ………………….
التعليقات مغلقة.