سيف جمال (عامية مصرية )
ابراهيم سمير عبد العزيز
لما سيف جمالك بيبرق
ينخرس كل الكلام
يرمي في حجري كل الورود
يسحب بساط النور
من تحت إيد الشمس.
°°°
لما سيف جمالك بيبرق
بحس بهزه جوايا
يتلجلج ويفقد توازنه كل الكون.
°°°
لما سيف جمالك بيبرق
كل نجمة بتخرج
وأُدام دارها تعلق زينتها
كل نجمة تزغرط
إن ضيّك لامس ضيّها
والسما تخلع عباية حزنها
يشق مولود جديد بطنها
ضحكته منوره
طعمه حتة سكره
وفوق شفيفك نهار جديد يبتسم.
°°°
لما سيف جمالك بيبرق
القمر مرايتهُ تنكسر
يتبخر كل العسل
على ورق الشجر يترسم
يحضن كل احساس جميل
يتجمع كل الكلام الحلو
سحابة على شكل قلب
وعلى أرضك ينزل مطر
بركان حب فوق جزيرتك ينفجر.
°°°
صدقيني
اللي قلته كوم
واللي لسه جوايا كوم ..
كلام كتييييييير
هيبهرك
بس سيبيني اعشقك
افتح دراعي..
أرمي بنفسي جواكي
انا لسه مقتنع
اني في سماكي اقدر أطير.
°°°
بس سيبيني أعشقك
واوعدك
اني اغير معالم الطريق
إن القمر بلون حنتك يترسم
والخرايط بالسنتي على خطوتك
بس سيبيني أعشقك
وامارس كل الطقوس
اقول كل الكلام
سيبيني مرة اكون بلال
اصرخ بحبك
وارفع اذاني فوق قبتك
التعليقات مغلقة.