سَماحْ بقلم حبيبة سلام
قالواْ في عْيونِكْ حَكايا
وْكَتَبواْ عَنِّكْ مِيتْ رِوايَةْ
فـْ سِحْرِ قَدِّكْ وِفْـ جَمالُهْ
فـْ عِشْقِ ليلِكْ دابُوا مَالُوا
وْقَدِّموا مَهْرِكْ حَياةْ
في ابْتِسامِة طِّفْلِ ماسِكْ
صَدْرِ أُمُّه وْ مُسْتَكينْ
عَ الجِبين وِالْخَدِّ باسِكْ
وِاخْتَلَسْ مِ الْحُضْنِ ضَمَّةْ
أُمُّه كانِتْ فايْتَهالُهْ
قَبْلِ ما تْفوتِ الْحَياةْ
فَجْرِ طَالِلْ عَ الْعُيونِ
السَّهْرانينْ
مِتْكَحَلين بِالطِّيبَة وِالشُّوقْ وِالْحَنينْ
في الْأَيادِي الْعَطْشانينْ
لمَّا تِشْرَبْ مِ الشَّقا عَرَقِ الْجِبينْ
في الْعِيالِ الْمَحْرُومينْ
في الْبَرْدِ مِنْ رِيحْةِ اِلدَّفا
وِالْقُلوبِ اِلْخُضْرِ تِعْزِفْ
بِالْبُكا لَحْنِ الْأَنينْ
ِياما كَتَبُواْ وْ ياما قالُواْ
اللِّي فِي سِحْرِ الطَّرْفِ مَالواْ
بَسِّ نِسْيُوا يكْتِبواْ “عفواً”،
“سـَــــــــــــماااااااااااحْ”
وْ يطْلُبواْ مِنِّكْ مَدَدْ!!
“سَماحْ”، يا سِتِّ اِلْكُلِّ نَظْرَةْ
وِابْتِسامَة فـْ يُومْ رِضَا !!
إِِنسي كُلِّ اللِّي مَضىٰ
وْخَلِّينَا نِبْدَأْ مِنْ جِديدْ
لَجْلِ اِلْفَضا يِفْتَحْ بِيبانُه
وْتِبْتِسِمْ لِيْنا الْحَياةْ
التعليقات مغلقة.