عواد و عواد
بقلم الفلاح الفصيح معوض حلمي -منشأة بطاش تمي الأمديد
دقهلية
………………………………..
عواد البايع أرضه زمان
كان متهان في البني آدمين
عواد البايع عرضه الآآآآآآن
لاجل رصيده يزيد صفرين
………………….
عواد العاشق لفة عودها
غير عواد اللي معري نهودها
عواد الخانق روح حواريها
غير عواد اللي موفي وعودها
عواد العايش على ناسه يهش
غير عواد اللي الهادم عش
عواد آبو نيه عفيه وحضن
غير عواد ابو وش ووش
عواد الشايل تل هموم
بيضحك ويداوي المهموم
غير عواد العايش غش
نازل هبش كما المنجوم
عواد الخابز لينا العيش
فقير الحال بينام ع الخيش
غير عواد ابو سنجه ومطوه
ثبت خلق الله تقفيش
عواد العارف معنى العيشه
غير عواد اللي اسمه حبيشه
خلى بناتنا يشيلوا صاجات
خلى ولادنا بيشربوا شيشه
عواد الطيب بيطيب جرح
بيبدر دمعه فنحصد فرح
غير عواد الزارع ديناميت
بيولع غيط فيموت الطرح
عواد الباني الفرن ابو عرصه
لسه على ودانه أثار القرصه
غير عواد المتربي مياعه
أخدها بياعه من اول فرصه
عواد الغاوي مراوي الغيط
على عرض بنات الدار بيشيط
غير عواد الداير عساس
عطاط الدور نطاط للحيط
عواد العايش عمره مشقه
لقمته حاف مش لاقيه الدقه
غير عواد الشغال سمسار
بيولع نار في ظروفنا الشاقه
عواد الدايب دوب بيحب
واهب ليها الروح والقلب
غير عواد أبو ناب بيسنه
آطهر منه وفاء الكلب
عواد المحتاج لكياس الدم
سارح لاجل يجيب المم
غير عواد الفاتح كرشه
ريحة قرشه بتنشع هم
عواد المتربي ف زمن الست
مش مسحور بالشات والنت
غير عواد ابو نانسي وهيفا
عاشق عري قناة التت
عواد العارف حق الجار
فاتح لسه بيبان الدار
غير عواد الناقص دينه
بصة عينه تطق شرار
عواد اللي مآمن بوجودها
وقت الغاره يقوم ينجدها
غير عواد الهادم فيها
تسأله عنها فينكر جودها
عواد السارح مع غنماته
إيده في إيد الست مراته
غير عواد الزايغ عينه
دايما سارح ورا لذاته
عواد ابو شؤروف وذلوع
زارع لاجل يسد الجوع
غير عواد الفايظ ماله
مايل حاله عشان مفجوع
عواد آبو مقطف وشادوف
عرقه الطاهر ضد الخوف
غير عواد الناهب ناسه
قلبه الجاحد ناقص شوف
عواد الساند ضهر بلاده
تلقى حنانه ف قلب ولاده
غير عواد المكري عليها
دم الخلق حصاده وزاده
عواد السارح آرضه يومياتي
ضم الرز وشاله قتاتي
غير عواد ابو ربع حشيش
باع النيش هلاس وفلاتي
عواد الحارس فيها العتبات
بيخضر فيها وزارع كرات
غير عواد البايع في ترابها
وقابض ……….. بالدولارات
وقابض ……….. بالدولارات
………………………………..
التعليقات مغلقة.