شايل شليتي بقلم/ عماد الأبنودي
حمول الدنيا بتكسرني
ملهاش ف الحياة آخر
من تقلها بأئن و تمررني
و حامد ربنا و دايما شاكر
حروف الكتابة ما توصفشي
أوجاعها اللي تقل جبال
و سنين العمر ما تهمدشي
كااااأنه وتر يقول موال
م الفكر يا قلبي لا تحزن
داير يلف كما الساقيه
تقولشي دماغي ليه مسكن
مفيش وياه أيها فايدة
متغرب أنا جوه مني …!
غريب تايه في زمااني
إيه فاضل م الحمول قولي
و إيه تعمل لو كنت مكاني
شايل شليتي واديني ماشي
و عادي إن قالوا رحال
يعدي الوقت كأنه ماجاشي
أصل الحال شبيه بالحال
فلسفة بس اللي يتعلم
و ينحت م الأقوال جواهر
يصبح بالحياة … معلم
صياغ يبع دهب فاخر
عافر مع الحمل و عاند
اوعي تنخ مرة يوم
قول للسنين لساني معاند
و الهموم مش راح تدوم
حملي التقيل لابد يزول
و كل بداية ليها نهاااااية
لحن الشجن مش هيطول
بكرا تسمعني ف أحلي حكاية
يحضن الهنا شراع قلبي
و يفرح تجاعيد نحتها الهم
ينور السعد خطوات دربي
و تدوب حاجات كانت تغم
ربك بأيده موازين الكون
بيغير الحال من المحال
و مهما الصعب ده بيكون
أكيد الجاي عااال العااال
التعليقات مغلقة.