(شخص عادي) بقلم.. وحيد علي الجمال سرس الليان محافظة المنوفية جمهورية مصر العربية
أنت عارف يعني ايه
عايش لوحدك ؟
رغم إن الكل جنبك؟!
حتي ممكن حد منك
يبقى ضمك
لا ونايم جوه حضنك
يعنى تصرخ جوه نفسك
بره نفسك
وانت ماسك في الوجع
حتى لو قامت قيامتك
حتى لو كانت نهايتك
مستحيل اللي انت ساكن
جوه حضنه هيتوجع
لا انت سامع حد غيرك
حتي غيرك مش سامعلك
هي شافت في الودع
إللي زيك ابن موت
لما شالت م الرواية
فصل كامل كان سكوت
كان بيسأل عن بطل
مهما كان المر علقم
يبقى بعد المُر موت
إوعى يبقي فيه شروط
حتى لو حبيت تعيط
ياله عيط..
اوعي تزعل لو عياطك
كان له صوت
اجبر المكسور في نفسك
اوعى كسرك يبقى سور
لسه جوه الضلمه طاقة
فيها فجر بألف نور
اوعي أرضك بعد زرعك
جوه زرعك تبقى بور
بين سطورك لسه سطر
لون حروفه بألف شكل
حرف جر وحرف جرح
حرف يكتب ألف فرح
لسه متعلمتش اضحك
وانت قربك كله شوك
المشاعر فيك عليلة
بس قلبي رغم جرحك
لسه ساكن ع الحدود
لو لقيت في السد سد
طير وعدي في المدود
حتى لو مقدرش قلبك
يبقى صفحة بدون جروح
عيش حياتك شخص عادي
جرح عادي..
مش مهم تكون ولي
في القصايد لك مدود
التعليقات مغلقة.