شراقي العمر.. شعر.. معوض حلمى
م البدايه
نظره منك كات منايا
نسمه بتعـطر هـوايا
م البدايه
وانت قلبك لسه هاوي
وانت عاشـق للغناوي
كنت طبطب ع المشاعر
كنت هدي الحس حبه
كنت عبي القلب رقه
وابتديها دقه دقه
كان هايتعدل مسارك
وانكسارك وقت ندمك
يبــقى هــين
تلقى ولفـك قلـبه لين
يلمحك يعرف ظروفك
من ملامحك لما تفرح
واضطرابك وقت خوفك
م المعاني اللي ف حروفك
بين سطورك يفهمك
وانت سارح ف السكات
هايحس بيـك
وانت تايه ف الشـتات
هيــــلاقيك
هيــــناديك
يسألك عن حب مات
حب كان مبدور أغاني
وحلم هاني وأمنيات
سيبته ليه ف الريح يعاني
وجاي تاني تقول سماح
دا اللي راح بيسيب آهات
واللي فات بيموت ماضيه
وخدت إيه ..؟
خدت إيه م الغربه قولي
لسه جاي طمعان ف فلي
وضلي رافض خط سيرك
آآآآه ياويلك
بعد قلبي مين سميرك
أنا كنت طيرك
باعزف الالحان ف ليلك
بامسح الأحزان واجيلك
وابني من أشواقي دار
واحنا لسه الريش خضار
إشتريتك ، إشتريتك
وارتضيتك تبقى عشي
كنت طاقة نور لوشي
وانت بايع باقتـــدار
بإختصار قصتنا عايزه
تدي صبري الصولجان
وتدي ليك ف الغدر جايزه
جايزه يمكن تبقى رادع
تعـترف إنك مخــــادع
وانت راجـع بالمـواجع
وقبل ماتدق البيبان
أنا كنت فارد حلمي مرسى
بعد توهتك تيجي ترسى
وانت برضه تزيد قساوتك
ياغباوتك ، ياغباوتك
دا القريب م العيون
ف الحشا بدر الخشوع
قاد الشموع
واللي خلى الهجر واحه
وساب جراحه مستباحه
ساب مساحه للدموع
فاوعـى تترجى القلـوب
أو تنزل دمعـتين
إوعى تشكي عمر فات
وعدى جري ف ثانيتين
كنت طبطب ع المشاعر
كنت هدي الحس حبه
كنت عبي القلب رقه
وابتديها دقه دقه
لمسة الأشواق تكفي
همسة العشاق تدفي
كنت وفي الوعد واكسر
رعشة الخوف الحزين
قبل جرح الروح مايكبر
كنت فكـر حبتين
كان شراقي العمر خضر
لو تبـــــــــدر بالحنــين
…………………………
بقلمي خون أنوب الجديد
معوض حلمي الفلاح الفصيح
منشأة بطاش تمي الأمديد دقهلية
التعليقات مغلقة.