شكرا ع الغيبة …بقلم شيماء عادل
طب اقولك شكرا ع الغيبه
واللا علي دموعي إللي نسيتها
رجعت وطولت الغيبه
والضحكه في بعدك أنا طويتها
تايه من بعدك والله سنين
والعين ما بقتش تشوف حلوين
ما تقولش نصيبي اننا نبعد
ونسيب مسافاتنا تتوه بينا
دا أنا ياما بكيت قلت ما تمشيش
وأنت إللي مصمم تقتلنا
وبتبعد ليه؟
لو تعرف إني كتييير تايهة
واخطائي في بُعدك مالهاش عد
ولا مره اخترت طريق ليا وكملت أنا فيه
ما أنا بعدك كل قرار باخده أنا برجع فيه
موجوع القلب إللي ف بعدك والله حيران
لو كنت نسيت أنا لسه بتوه ليل ويا نهار
طب الوم علي مين
علي دمع سنين ما نسيش لحظه بعدك ليا
واللا علي عيوني رغم القسوه فيها حنيه
واللا علي قلبي إللي اختارك واتعذب بيك
طيب علي قد عيون الموج
إللي بتخطف من غير مواعيد
يا حبيبي تلين
وترجع عمري لايامي
وترجع ليا أحلي سنين
التعليقات مغلقة.