شمس غابت من زمان بقلم..مدحت رياض
قلت بكرة الجرح يهدى
إيه في ايدك غير هتصبر
عدى بكرة وبعده بكرة
والجراح بتزيد وتظهر
ده الألم خد خبرة أكتر
كل مادى بيبقى أكبر
والدموع أكبر دليل
إن بكرة زي بعده
والزمن موش فارقة عنده
تتسند أو يوم تميل
وان حزنك ليك لوحدك
والسنين بتمر عادي
موش هتفرق عند غيرك
انت رافض ولا راضي
قولي امتى تبات دموعك
فوق مخدة تخص غيرك
قولي مين عدل مساره
لجل يبقى في خط سيرك
عشت ترسم بين حروفك
تاج وفرحة لكل حد
وأما جيت ترسم لقلبك
جه في طريقك الف سد
تبتسم فتبان ملامحك
شايبة اكتر م الأوان
واستحاله أن انت ترجع
الا لو رجع الزمان
والزمان موش طبعه يرجع
مهما تنده موش هيسمع
ماشي وف كل الحالات
موش هيضحك لما تضحك
موش هيبكي لحد مات
كل حاجة هي هي
بس روحك عنها غابت
هو ده أصل القضية
وسط حزنك هي شابت
موش بتلمس شئ جديد
الامور صبحت عادية
والروتين والوقت بايخ
عيد يعدي وبعده عيد
بس طعم الفرح ماسخ
روح لوحدك ع المكان
اللي مدفون فيه جراحك
هو ده نفسه المكان
اللي فيه هتعيش براحك
واوعى تضعف وسط لمة
ابكي وحدك في المفارق
لما يرجع وقت دمعك
ويا ذكرى لحد فارق
شمس بكرة في يوم هتطلع
وانت موش موجود معاها
موش هتمنع نورها حزنا
لما هتغيب عن سماها
بيك ومن غيرك هتطلع
والنجوم هتظل تلمع
الحياة كما ساقية دايرة
والمراكب برضه سايرة
أوعي عينك يوم تغشك
تبقى أكبر م الحقيقة
انت حجمك هو حجمك
هي دي أسلم طريقة
تقضي بيها بقية حياتك
لو فيه باقي لعمر ليك
اوعى تنسى في يوم مكانك
لما تسرح أو تفكر
وابقى حاول تبقى صابر
ايه في ايدك غير هتصبر
التعليقات مغلقة.