…… شوف ياعم …….
معوض حلمى
طب شوف ياعم
اوزن لي صبر
هاشيله زاد
عشت الحياه
خالي الوفاض
والهم زاد
وإن كنت
باقي ع المحبه
شيل عني حبه
أنا كيلي فاض
ماتشيل ياعم
طب شوف ياعم
نازله الدوع
ع الخد سيل
ومفيش رجوع
ولاعادش حيل
ولاعاد فرح
للي انجرح
ولا عاد معين
للروح سند
ماتعين ياعم
طب شوف ياعم
كنا زمان
كنا الدفا
ولا حد خان
ولا كان جفا
كان فيه نفوس
زي الشموس
تغزل خيوط
الضلمه نور
الطيبه خال
والحضن عم
ماتفوف ياعم
طب شوف ياعم
فين الصديق
لو صدقه عم
ينشل غريق
من قعر يم
ويكون جدع
خالي البدع
يصد عنك
أعتى ريح
ويداوي روحك
م الوجع
واشهد ياعمطب شوف ياعم
زرع الغيطان
على عوده مات
ضل الحيطان
قسوه وسكات
ولاعاد حكاوي
الطيبيين
ولا عاد سواقي
العطشانين
بتدور حنين
ماتشوف ياعم
طب شوف ياعم
ولو سمحت
إديني عقلك
وقولي بس
إزاي دبحت
النور ف قلبك
وإزاي تجور
وتهد دور
فيها البنات
فيها الولاد
لاجل الأمان زارعين بخور الامنيات
ماتشوف ياعم
طب شوف ياعم
الأخ فين
وفين حنانه
والجهل دين
سايق جنانه
نافش ف ريش
الخوف طرح
بقى زي جيش
نمل وسرح
ماتحوش ياعم
ماتحوش ياعم………………………
بقلمي الفلاح الفصيح
معوض حلمي
منشأة بطاش
تمي الأمديد
دقهلية
التعليقات مغلقة.