صلاه من اجل الوطن بقلم اشرف الشناوى شاعر عاميه البرامون
ياوطن مكسور
عمال بيحلم
بالهنا والنور
ياوطن عصفور
أفرد جناحك
فى الهوا وطير
ازاى هتفضل ياوطن
العمر كله اسير
واغسل جراحك ياوطن
اصل الوجع دا كتير
الصبح جايلك ياوطن
شايل امل قناطير
وف كف شايل وردته
وف كف شال الزير
ياوطن
مالك كدا محنى
أفرد ياوطن
طولك وسامحنى
لو دمى ليك ياوطن
انا راضى تدبحنى
ليه الكلاب ياوطن
دايما بتلمحنى
تنهش فى توبك
ياوطن وتجرحنى
ياوطن
سلمت دقنك ليه
للى باعوك وب ايه
واللى اشتراك ياوطن
راهنت تانى عليه
الورد فيك ياوطن
طارح دانات وبارود
والله ضاع الوطن
من يوم ماقالوا حدود
بغداد وفيها الوجع
مادد دراعه هناك
وسوريا زى اليمن
والكل فيهم مات
وغزه من غلبها
طالبين لها الصلوات
ماتقولى فين غنوتك
والا نقول اشتات
ولحد امتى ياوطن
نفضل كدا
اموات
ولحد امتى ياوطن
نفضل كدا
اموات…………….
التعليقات مغلقة.