صوتك..
بقلم مدحت رياض
الصوت ده موش صوتك
جبت الحروف دي منين؟؟
معقول يكون موتك
في وداني قبل العين
ادفنني في سكوتك
وكفاية تاني كلام
لو غبت هيفوتك
بركان عذاب وملام
احبسني في الماضي
واقفل بمليون يوم
انا راضي بيك قاضي
لو حتي اكون مظلوم
صدقني موش عادي
تقتلني بحروفك
وتعيش على الفاضي
مقفول عليك خوفك
حررني في الآتي
خليني اعيش ذاتي
صالحني ع الايام
لو حتى ببعادك
هتفيدني ايه اوهام
ما الصبر كان فادك!!
ابعدني عن قلبي
متخليهوش يحكم
صدقني موش ذنبي
يمكن بعيد ارحم
من دمع موش ساكت
وحاجات كتير ماتت
الدنيا موش واقفة
علي قرب ولا بعاد
ولا شمعة بتطول
ما دام في يوم تنقاد
هيجيها يوم تخلص
والباقي بس رماد
ادفنني في سكوتك
وكفاية تاني كلام
الوقت هيعدي
واهي ذكري يوم تنعاد
وساعتها هتبسم
يمكن مع التنهيد
قصتنا محسومة
معادش تاني جديد
معادش تاني جديد
التعليقات مغلقة.