صورتي معكوسة ف مراية بقلم مدحت رياض
كتت من جوايا حاسس
إنه كان قرب يفارق
بس وقت العمر سارق
قلبي كان رافض يصدق
مهما كات واضحة الحقايق
قلبي متكسر وضايع
كل دقة في حضن شارع
كل حرف ف ودني سامعه
لما بيقول إنه راجع
كل ضحكة وكل بسمة
كات بتدي العمر نسمة
بس دايما كل قسمة
ليها في الآخر نهاية
كنت حاسس إن بكرة
إبني موش هيكون معايا
واللي أغرب
إنه كان دايما يقرب
يبتسم ويقول علامة
قال وكرر ألف مرة
إنه هيسيبنا بسلامة
وإنه هيودع بسرعة
واللقا يوم القيامة
ابتسامته كات كفاية
لما يصحى ويرميهالي
تبقى دي أجمل بداية
تفرش اليوم بالسعادة
ضحكته في الأصل عادة
مهما يزعل ولا يحزن
كات بتكبر كل مادا
عاوز أقولك إنه بعدك
الدموع بتنادي بعض
وانه بالرغم إني عايش
قلبي موش موجود مكانه
موش بحس بأي نبض
والضلوع باردة وحزينه
والعيون عطشانة ود
والسؤال عنك يا عمري
لسه محتاج ألف رد
موش هقصر شعري تاني
موش هكون محتاج لزفة
أو فرح أو صوت أغاني
كان كلامك فيه براءة
بس بيوصل معاني
قالوا ودع قالوا فارق
قلت ياربي اللي خالق
احتسبت الغالي عندك
واللقا والوعد صادق
مشهد الرحلة الأخيرة
البشر أعداد كبيرة
جاية بتودع صباك
ما أنت غبت وسبت سيرة
خلت الأفواج مسيرة
تنفرش بيهم خطاك
ما أنت روح طاهرة وبريئة
كنت نفسي أشوف طريقة
واندفن جنبك هناك
بس موش خايف يا عمري
للكريم سلمت أمري
ما انت في الآخر ملاك
جه وزارتي وعاش معايا
كنت يمكن نسخة مني
صورتي معكوسة في مراية
بس عمرك موش بإيدي
والسنين الباقية بعدك
موش هتخرج من وريدي
الرسالة الواصلة منك
حاجة أكبر من كلامي
فيها بتوصيني أضحك
وأما بتقولي امي نامي
وأما تبعت يوم وصية
تنذكر فيها الأسامي
ببقى حاسك فيا عايش
حتى بترد في سلامي
الحيطان بتنادي صوتك
كان يهون الروح تسيبني
بس ما يهونش إني أفوتك
في النهاية يا قلبي حاسس
إني ميت بعد موتك
التعليقات مغلقة.