ضحك مريم…بقلم الشاعرة عبير عبد المنعم
نفسي أكتب شيء غريب
شيء بيطرح أمنيات
شيء يشد الفجر يجري
يختصر ف الذكريات
يقرا فاتحة ورد فتح
فوق ضفاير البنات
نفسي أكتب شيء غريب
يملى بطن الجوع بعيش
عاوزة كل حروفي جيش
يحمي قلبي من السكات
ينهي جوايا الصراع
هو ايه وليه ومين
هو صح الحلم فين
ولا كله هبو ريش
نفسي أكتب شيء يكون
في احتمال المستحيل
هو كل الممكنات
نفسي الف المعنى لفة
زي باقة ورد زاهية
تشرح القلب الحزين
وامشي افرق ليل مندي
ع الحيارى السهرانين
نفسي أكتب شيء غريب
شيء بيشبه قلب حارة
في المسا تغني لحنين
والارابيسك اللي عاشق
لون عيون المداحين
شيء بيشبه عود فريد
ولا ناي شبعان أنين
نفسي أكتب شيء غريب
شيء بيشبه ضحك مريم
كل ضحكه تساوي عيد
شيء بيشبه حضن أمي
كاسر الحزن العنيد
نفسي اكتب حرف سكر
والضمه بخيط الغلاوة
نفسي اهادي بيه حبايب
زي عقد زمان حلاوة
نفسي أكتب شيء غريب
زي روحي ورايحه عني
رايحه ومسافره بعيد
تاركه كلي وهاربة مني
لاجئة للجنة أكيد
عارفة سر وجودها جايز
والحنين عمال يزيد
نفسي أكتب شيء غريب
التعليقات مغلقة.