” ضمير شاعر ” بقلم/ وحيد علي الجمال
وليه ديما بيوت الشعر
بنبنيها كدا هشه
بنكتبها ونسكنها وندفى
ونتمشي على حروفها ونتأنس
مع الصحبة ونتقابل ونشرب نخبها
السامي ونعمل ليها كام زفه
نفصص في تفاصيلها ونتغزل
في بنينها ورصتها ومعانيها
وينفش ريشه كام شاعر
ويعمل نفسه قال واعر وينقدها
يطلع سلسفيل عينها
وناس تانيه تسقف ليها وتشلها
على رأسها تمجدها
وشد الحبل يحكمنا مافيش
غالب ولا مغلوب
حراك شعري كدا مرغوب
بنتخانق في عشه كلها ديوك
قانون الشعر للجاهل ميزان مقلوب
يحس الصورة مش واضحة
في قلبه يكون له ميكروسكوب
دي دنيا الشعر والله فتن وحروب
بنبي فيها احلامنا
ونصحي فجأة من نومنا
نحدفها كدا بالطوب
بنطلع من قصيدة حزن
بتسلخ جلدنا و روحنا
وفجأة الفرح يلبسنا
كان الجنه مخلوقة في احلامنا
نقوم وفي عز ثورتنا
فنكنس منها دمعتنا وننكرها
ونرميها كأن الرجس طال فيها
ماتسألشي عن التعليل
بنحلف بيها ونخنها
ولا بتقدر في وقت الحرب تسترنا
واول واحده من توبها تعرينا وتفضحنا
بنبدرها في احلامنا ونبكيها على المسرح
ونشحتف بأشوقنا ونطلع للسما نسرح
وتتشرط على اكبر قلم فينا
وتتسرمح وممكن حتى تتفرعن
شيطانها يحط برحاله
ياإما توافقه في جنانه
يااما فجأة ينهيها
اهي خلصت كده الصورة
وبانت لبة الفولة
وصورة تكرر الصورة
وحاله تشبه الحالة
يجوز يمكن اكون عكيت
وجبت البحر جنب الغيط
وارض البحر لا بتزرع ولا بتطرح
وملح الأرض بيشقق حيطان البيت
في ناس في الشعر أواله
في دنيا الشعر سلطانة
بتحمل جوه وجدنها
ضمير شاعر مهش للبيع
ولا ناوي يبيع نفسه
عشان قرشين
التعليقات مغلقة.