ضمينى على حِجرِك … بقلم حسن أبو عرب
فى اديا ماسك سبحِتِك
وكأنى ناسِك من زمان
وحشانى يمَّه ضمتِك
لمسة اديكى والحنان
يا طوق نجاتى ودفِتى
مصدر سعادتى وقبلِتى
فى رضاكى بتكون جنتى
وياكى بيتولد الأمان
ياصامده فى وش الرياح
و معلمه قلبى السماح
يامطيبه كل الجراح
ومنوره الليل والظلام
يَمَّه ياجبل الصلابه
خلى بالك م الغلابه
ابعدى عنا الديابه
وارسمى لوحة السلام
احكى يمه كان وكان..
احكى عن ناسنا العظام
واحكى عن زمن الصحابه
احكي عن خير الأنام
قدوه للخلق وامام
النبى بدر التمام
م الرسل مسك الختام
ولا اقولِّك؟!
يمه فى زمن الهوان
ضمينى على حجرك أنام !!
التعليقات مغلقة، ولكن تركبكس وبينغبكس مفتوحة.