ضيا عينها بقلم الفلاح الفصيح معوض حلمي منشأة بطاش تمي الأمديد دقهليه

ضيا عينها بقلم الفلاح الفصيح معوض حلمي منشأة بطاش تمي الأمديد دقهليه

بالنسبة لأمك ياولد
شيفاك ضيا عينها
تبقى لها ضهر وسند
في الشده وتعينها
إياك ف يوم تنسند
على خلق بايعنها
وإياك يغرك عدد
تنسى اللي كان منها
دعوتها ليك المدد
لو غيبت يوم عنها
فإياك تدق العمد
على طينه غير طينها
وإياك تسيبها ف كمد
ودموعها شقينها
وانا بالورود عطرت كوني
لاجل يحضن شوقي شوفها
لما تبـعـد عــن عـيوني
بابقى نفسي أموت واشوفها
والآقي طيفها يمس روحي
يحتويني تطيب جروحي
واروح لها
وانا أمي لسه بعزها
لساها فارده ضلها
وشراعها بارع
والشوارع والحواري
في البلد تشهد لها
السيره كانت أبهه
لساها أجمل م المها
وأنبه نبيهه
كل أنواعها الشبيهه
فعل ماضي
إلا أمي جت مضارع
لاجل يومي يفوت لبكره
يجيب لي فكره
ونن عينها كان لي شارع
كان براحي وكان غيطاني
ملعبي ومليان حنان
وكان ميدان بيساع جناني
ولما همس الشعر جاني
جاني منها .. ومن عيونها
فاوعاك تصدق اني شاعر
وانا كل حاله تمس روحي
جايه منها والآقي بوحي
بحر فايض بالمشاعر
إحساسي يبقى عويص وواعر
لما بانوي ع السفر
واسهر وابات
وافتح دولابي وشنطتي
والم كل الذكريات
وارحل بعييييييد
والشوق يزييييييد
واشعر بإني بقيت رفات
وانادي يامه.. وحشاني يامه
محتاج لضمه
واحس لهفة قلبها
جايبلي دعوة منها
تحيي اللي مات
وتفوت شهور
شهر رايح وجاي شهر
مر عمر وعدى دهر
حسبوا عمري
بالدقايق والسنين
والله يامه
صحابي دولا مخدوعين
بيقولوا ليا ف عيد ميلادك
طار الحمام حوالينا حط
ومبسوطين
جهزوا م الشموع أربع دست
على سبعه فرط ووردتين
وبقالي عمر بعيد ميلادي
ماحتفلتش
من يوم ماخدتيني ف حنانك
كل أما بارجع م السفر
وتقـــولي ماكـــبرتش

وتقــولي ماكــــبرتش
ـــــــــــــــــــــــــــــــــ