طار الحمام…شعر اشرف الشناوي شاعر عامية البرامون – المنصورة
طار الحمام م البنيه
عالجنه يشرب م الميه
لفوه ملايكه بحنيه
طار الحمام بين الفراديس
شايل معاه أجمل فوانيس
حمام جميل أشكال وألوان
عمال يلف في كل مكان
يغني ويردد الحان
شويه عود وشويه كمان
محلا الحمام بلدي يامحلاه
طار الحمام والحلم معاه
نزل الغراب عالبنيه
يهدها فوق الزغاليل
والخلق واقفه بتتفرج
وكل ثانيه يشيلوا قتيل
زعق الغراب وبعزم مافيه
اتلموا عالعش حدادي
وغزه تنده ياولادي
فين العرب فين الحكام
والكل نايم متغطي
دافس في راسه كأنه نعام
طار الحمام م البنيه
نفسه يلاقي في حته سلام
ياسلام سلملم اه ياسلام
اسلامنا كله كلام في كلام
اسلامنا كله كلام في كلام
التعليقات مغلقة.