طاقة نور بقلم..حسن أبو عرب
ياكاشف خبايا القلب
والمستور
الناس بتاكل بعضها
جِوَّا مدن وكفور
والرحمه ماتت يابشر
مش باقى غير الزور
كلت الديابه الغنم
والدم عاص الدور
والصدق ولى ومضى
والكدب زاد والجور
فين الأصيل يابشر
ليه الطير صبح مأسور
عم الفساد وانتشر
والخير صبح مقبور
ليه خنقوا ضى القمر
ولاعتش فيها سرور
والعدل بينا اختفى
مَيِّت غريب مقهور
هَجَر اليمام الشجر
والأرض صبحت بُور
امته يلين الحجر
امته الضمير هيثُور
يادنيا لسه الأمل
جوه القلوب مبدُور
اخلع عبَاية الفشل
قُم رَمِّم المكسور
يابَدر يلا اكتمَل
خلي العتَامَه تغُور
والفجر يضحَك لِنا
ويكون سفِيرُه النور
التعليقات مغلقة.