طاووس حاير
بقلم سعاد الزامك
قالوا عليه
دا عاش مجبور
في ضِل الجور
بإيد مكسورة مش طايلة
بنات الحور
في كاس بنور
تناجي حروفه .. متمايلة
جابوا له عطور
و طن بخور
قادوا له الشوق بنار هايلة
و قالوا عليه .. دا مش شاعر
يادوب ينقش له رُبع السطر
بيتفنن له في مشاعر
مابين حرفين مِزاجهم مُر
يشق البير و بيعافر
ولا بيمل و لا يتحر
و قالوا عليه
كتاباته يا دوب نونو
بتحبي لسه فوق الأرض
بيلضمها بحروف لولو
فتتمختر بشرق و عرض
طاووس ناشر جناحاته
يطير لكنه تحت الأرض
يغوص و ينادي مولاته
ما يسمع غير صدى مرتد
و قالوا عليه .. ميتين قصة
يتوه في وشوش كما الغُصة
يشب .. ينط و يادوبك
يجافيه الهنا بخسة
و أحلامه تسيل سيلان
و آماله تِهد حيطان
يفرقهم مآسي الظلم
و دمعه يِدَوّب الصوان
لا من غيرة ولا نُكران
لكلمة ف يوم قالوها عليه
التعليقات مغلقة.