طبعا مش كل السيدات …معوض حلمى
….. قولنا .. وقالوا …..
قولنا وقالوا كلام أفلام
طبع وفي النسوان ودانه
لت وعجن وليه يامدام
كلمه وتكبر تصبح دانه
وليه بيخلي لسانكوا السام
سيرة الخلق حداكوا لبانه
حتى وانتوا ملايكه نيام
في الأحلام رغي وزنانه
قالت ليا البت سهام
ويا فلان مشيت علانه
طيب سمعت أي كلام
سمعت من صحبتها فلانه
طب هانصدق مين ياوسام
إياكي تسمعي من بلانه
عابوا فلان بكلام هدام
وإن فلانه ملانه خيانه
وان عواطف جالها زكام
وأم حسام دايما دبلانه
وأم نعيم بيقول لي هشام
بابها اتكسر م الديانه
وان البت سهير الخام
طلعت بنت الإيه سهتانه
وان الواد بهلول إنضام
جاتله كورونا وربي عفانا
وأمه بقالها كتير أيام
لونها يابت بيقول تعبانه
والا البت إيمان ياسلام
جالها عريس وجيوبه ملانه
وبعد ماكان شبشبها خرام
والعبايات براغيت وتانه
لبست ساعه وكوتشي غرام
والفساتين بحرير وستانه
وبعد دا كله تقول ياملام
مالنا ومال الناس يابهانه
سري معاكي وسركي نام
جوا ف قلبي وحاجز خانه
إوعي الفتنه سيوف وسهام
زي كلاب هايجه وسعرانه
عايز تبقى كريم وتمام
إوعاك تقعد مع لسانه
يلعن ام لسان نمام
ذاع السر وعاش ويانا
وإن الخلق ناقصها علام
وإن الدين قدام خلانا
وان العرض إهانته حرام
عنه نبينا الهادي نهانا
قالوا وقلنا كلام أفلام
طبع وفي النسوان ودانه
لت وعجن وليه يامدام
كلمه وتكبر تصبح دانه
كلمه وتكبر تصبح دانه
……………………………..
بقلمي الفلاح الفصيح
معوض حلمي
منشأة بطاش
تمي الأمديد
دقهلية
التعليقات مغلقة.