طـرحـت بـصـل
أسـمـاء الـبـيـطـار
اسمحوا لي أولاً بتجربة شخصية أنا نفسي اتعلمت منها
يمكن من ساعة ما وعيت على الدُنيا و أنا متعودة لازم اشوف قدامي زرع اخضر أمي ربنا يديها الصحة ديماً كانت تزرع ريحان مع إننا مش من اصول ريفية أو من الأرياف .
بس طلعت زيها لما كنت مسافرة بره طبعاً مساحة البيت كانت تسمح إني ازرع حاجات كتير و كان ليا حظ فيها كبير حتى لو زرعت بين صخرتين .
لما استقريت في مصر طبعاً اللي واخد على شئ عمره ما بيتخلي عنه
سبحان الله حاولت ازرع كتير بس ما كنش ليا نصيب في أي زرعة انها تطلع معايا حتى اللي كنت متعودة عليه .
ايأس لا طبعاً مش طبعي .
جبت كوباية و حطيت فيها بصلة آه و الله بصله من العادية بتاعت الطبخ بتاعتنا دي بس ما تضحكوش ههههههههههه
انا المهم اشوف حاجة تريح العين .
و سبحان الله قعدت في الكوباية حوالي شهر و هي قدامي على الشباك صعبان عليا ارميها و كل يوم اسقيها
و طبعاً ولادي خلاص بقى يا ماما ارميها و أنا هجبلك اي شتله تزرعيها بس أنا سبحان الله متمسكة بيها
لحد ما في يوم قومت لقيتها مزهرة و العود الأخضر طالع منور
فرحتي بيها بجد ما تتوصفش و كأنها وردة بلدي قدمي .
فرحت إن كان لصبري نتيجة و السعادة اللي بكتب بيها عليها اكيد باينه من كلامي و طبعاً جبت الولاد و فرجتهم عليها .
طولت عليكم كـ العادة
بس الغرض من موضوعي
إن مش عيب إنك تغير الهدف بتاعك ما دامت الأمور تسمح
ازرع امالك و طموحك و اصبر عليهم هييجيوا في وقتهم اللي ربنا محدده
ما تبقاش عَجول و متسرع و تيأس بسرعة .
ما فيش حاجة حلوة بتييجي و بستمر إلا بحبك انت ليها .
اكيد ربنا عالم بحالك
و ديماً يقينك سابق صبرك
التعليقات مغلقة.