طوفان سيلِك …شعر حسن أبو عرب
شديت حروف الكلام
من بين مواويلك
ورسمت غصن وحمام
بيزِيْنُوا جبينِك
ونزلت بحر الغرام
عشمَان اعدِيْلِك
ورسمت ساقيه وغيطان
ورويتها من نيلك
وزرعت أرضك سلام
وكرهت طُول ليلُك
وحلفت اجيب النهار
من ضي قناديلك
ياعاشقه صمت الكلام
ياراضيه بقليلك
بالحب غنَّى السلام
فوق طَرف منديلٍك
تحمي لسماكي نسور
تشبه طوفان سيلك
يامصر ارخي اللجام
يلا اندهي خيلك
ياما ناس سَكنهَا الهوى
سهرانَه تحكيلك
نَاسْيَه الهموم والوجع
مش ناكره لجميلك
وصفوف من الفرسان
واقفه تناديلك
فى الفرح بتشاركك
فى الشده تدعيلك
يا امُّ الهرم والنيل
قومي اصلُبي حيلِِك
التعليقات مغلقة.