طول مالرزق عالله…. بقلم اشرف الشناوى شاعر عاميه المنصوره البرامون
ارمى الشبكه ياخال
تلقى الرزق العال
ربك رب قلوب
والعالم بالحال
رزقك مش بلطيه
او خاتم سليمان
رزقك مش فى الميه
رزقك م الديان
ارمى الشبكه وسمى
تلقى الخير الوان
ربك أصله كبير
والخير بالقناطير
ارمى الشبكه ياخال
مهما يضيق الحال
بكره هاتصبح عال
عمر الرزق ماكان
بالقوه وبالمال
احلى الرزق ياخال
تلقاه راحة البال
ارمى الشبكه وغنى
رزقك ياد مستنى
واوعى تقول دا قليل
بركة ربك دايما
ممكن تبقى فى عيل
ارمى الشبكه ياخال
بكره هاتصبح عال
صلى الصبح ويالا
خلى العزم عالاله
ربك عمره ماخلا
رزق العبد مذله
ارمى الشبكه ياخال
طول مالرزق عالله
تتغير الاحوال …………
التعليقات مغلقة.