طول ما احنا بنحلم …
بقلم رضا أبو الغيط
طول ما احنا بنحلم
طول ما احنا بنحلم مش هنموت
والقلب هيرقص بالنبوت
وهنزرع جنب الحُب أمان
وسلام بيرفرف ع الملكوت
فبلاش نستسلم يوم للخوف
ونفوت المُر يخش الجوف
بكره الأفراح ع الناس هتطوف
وهتسند عودنا بفرعين توت
طول ما احنا بنزرع ف الأوطان
بساتين م التقوى والإيمان
الحب هيملا كل مكان
من غير قوانين ولا حتى شروط
فبلاش أحزان ولا كتر كلام
واستنوا معايا بداية العام
والخير هيعم مع الأيام
والكل هيبقى سعيد مبسوط
طول ما احنا بنسعى لفعل الخير
وأملنا نساعد كل فقير
الخير هيقضى الناس والطير
وطريقنا الصعب أكيد هيفوت
فبلاش م اليأس وكلمة آه
وتعالوا نشوف ايه اللى وراه
بكره العيان هيلاقى دواه
وبطون النمل .. تلاقى القوت
طول مااحنا بنحلم مش هنموت
إرادتنا حديد ف الصعب نفوت
بالصبر وقوة بسم الله
للمجد هنبنى قصور وبيوت
وان كنتوا نسيتوا يا مصريين
اسألوا مين هو طه حسين
واعرفوا اننا دايما قادرين
من عتمة ليل القهر نفوت
رضا أبو الغيط
التعليقات مغلقة.