عابر سبيل شعر / وحيد علي الجمال
المسافه نُصها
كان وقت ضايع
والكلام كان شخبطه
بين السطور
والضمير كان مستتر
تقديره غايب
رغم الجروح
الحنين رافض يثور
كنت مرغم ع الظهور
من غير علل من غير كسور
تقديري فوق كل الاوائل
ترتيبي كان اخر الطابور
لسه احلامي بتطلع
في الشراقي
لسه متعشم الاقي
اسمي مكتوب في الحضور
مافيش مابينا اي باقي
انت اللي حددت الثمن
والبيع نهائي
اعمل على قبري مزاد
اوزن كلامي بالعدد
انت الوحيد من غير ثمن
والكل زاد
المسألة بره الكتاب
واخد أوامر بالغياب
الذنب شاب
بكره طالع برده منك
اللي انت شوفته في المنام
ملهوش علاقه باعترافك
متراودش قلبي تاني
اصله شافك في الصور
من غير رتوش
سافر بعيد
لما نام فتحوا الوصيه
كل حاجه هي هي
حتى ابتسامتك
لسه غرقانه بخجلها
ملهاش مثيل
الذكريات
حافظه شكلك
وانت بتعدي الحواجز
وسط الضلوع
اطفي اخر شمعه
كانت جنب قلبك
اخر قصيدة كتبتها
واعتبرني بعدها
عابر سبيل
التعليقات مغلقة.