عاجبك كدا… متخافيش منى …بقلم اشرف الشناوي شاعر عاميه البرامون
متخافيش منى
دا انا
ايوا اللى حبك
واستوى
لفق الوجع
ويا الهوى
ايوا انا
عاشق بيوتك
كلها
حتى السكك
حتى قضبان
الحديد
حتى الشجر
عاشق ملامحك
من بعيد
انتى فاكرانى
بجم
او سيف يزيد
مش ها زيد
حبك شبك قلبى
الشهيد
انا اللى طلعت
من حلمك بليد
فمفيش جديد
حتى الغنا زى الحكاوى
الميته
لاضحكه هزت روح
ولا
حواديت تحل
المسأله
جلا جلا
وكلانى ليه بالحنبله
والحنجله
رميانى ليه
فى المفرمه
والا انتى يعنى
مغرمه
بالملحمه
عاجبك قوى
طعم البكا
عاجبك قوى
لون الجراح
صوت الصياح
والا السياط
والا العياط
عاجبك قوى
ريحة الشياط
للجلد لما بيتشوى
عاجبك قوى
حكم القوى
والسيف على رقب
ضعيف
عاجبك قوى
لون الخريف
عرقى النضيف
عاجبك قوى أفضل
كفيف
واركع واصلى
للرغيف
عاجبك انا
من غير لاحولا
ولا
ولا قوه بالله
العظيم
عاجبك كدا
افضل بهيم
اطحن سبل وأعمل
طحين
للساده .اللى واقفين
شبعانين
عاجبك كدا
بالله عليكى تعرفينى
فى شرع مين
ان الغلابة يخدموا
حبة لصوص
متعممين
والا انتى طرشه
ودن صانجه
ودن طين…………….
التعليقات مغلقة.