عادي بقلم مدحت رياض
العمر ماشي في سكته
والدنيا بتنسينا عادي
ودليلي كان في عنيكي واضح
وانت واقفة هناك قصادي
مبقتش فيه لهفة عيون
مبقتش تتمد الأيادي
ورجعت اقول
ان اللي اتخبى في حضن الموت
كان نفسه يعيش
وان اللي اتغرب عن روحك
مجبور ميجيش
وان يوم سالونا عن الفرقة
بنقول ده نصيب
والماسك باللهفة في ايدك
بالغصب يسيب
بالذمة ازاي تبكي عيونه
وتقول ده حبيب
بالذمة حاربت عشان تفضل
والجرح يطيب
ولا انت لقيت البعد اسهل
من ميت مشوار
كام دمعة هتنزل على آهة
وكاسين اشعار
تشربهم تتطوح روحك
وتنام مكسور
وتعيش تترحم على قصة
والساقية تدور
تطحن احلامك أو تنعي
والحال مجرور
والعمر المتغمي عيونه
هيجيله الدور
وتحس ان حياتك واقفة
على موقف فات
على حب اتعذب من قلبه
وف الاخر مات
التعليقات مغلقة.