عارفني
جمال زكي عينر
عارفني حبيبي وانا عارفه
وحرف كلامي من حرفه
ده كان ياسمينة في البستان
وبايديه انا قاطفه
عارفني وعارف احوالي
وعمره ما قاللي وانا مالي
وبيشارك سنين عمري
بيلمح حتى ايه ف بالي
عارفني قد مانا عارفه
شايفني زي مانا شايفه
ولو يطرحني من عمره
بشوق وحنين اكون ضايفه
عارفني ودمه من دمي
وابوه لا خالي ولا عمي
لكن روحي فدا روحه
حبيبي وهمه من همي
ده انا لو كنت ما عرفتوش
ولا اخترني ولا اخترتوش
ماكنتش عشت ايامي
وكان عمري يعدي فشوش
لكن جاني وانا جيته
وهبني عمره وهويته
يا محلا العيشة وانا وياه
وبيتي خلاص صبح بيته
بقلمي الشاعر جمال زكي عينر
التعليقات مغلقة.