عارف شعر / جيهان النجار
عارف لما بتفوتني؟!
/ضجيج الصمت
ف بعادك بيخوتني
ويتكاتر عليا الخوف
يموتني
ألملم سيرتك
العطرة
فاينزل سيل
هدوء وآمان
ترخ الفرحة كالمطرة
فاجيب سيرتك
كمان….. وكمان
كأن الحب أغنية
كلام قلبي
وروحك أجمل الألحان
ماهو انت السر
ف وجودي
وانت حبيبي
ناتج عمري
بعد إضافة
الفرحة
وطرح البعد
والأحزان
ماتبعدشي ….
هنا أرضك
أنا عرضك
ودولة حلمك الممدود
أنا طول الأمل والصبر
وعيوني وعمري حدود
انا صدقني
عاصمتك
ومينا حنان
تعالي نخترع بكره
مالوش غير
حبنا عنوان
متوحشنيش
ولا سنتى…. زيادة كمان
اموت منك
كتير الشوق علي قلبي معادشي
مكان
مسافة الحب
لو زادت
بيحتاج السهر
شريان
يقصر ليلة الغربة
يسيب شراعة الذكرى يادوبك تبقي متواربة
يخش النور
حبيبي يا أمير العشق يا……مغرور
عارف لما بتفوتني
بتقف الدنيا علي ندهة صباح طيرك
عشان فضلة صباح خيرك
صباح النور .
التعليقات مغلقة.