عدت سنة بقلم مدحت رياض
ازاي تكون عدت سنة
أو فات عليه أيام كتير
من يوم وداع كان الأخير
مبقيتش فاكر عدى كام
أيوة الفراق كان في اللقا
أو في السلام
ومعادش يجمعنا الكلام
معادتش إيدك تتلمس
والروح في بعدك تنحبس
والقلب يستنى المنام
الصبر أصعب من جبل
طال السما
والعين ساعات من دمعها
بنحسها شكل العمى
وتشوف طريقك كله موت
حتى الآهات اتعلمت
توجع
ومن غير حتى صوت
وأنا زي ما يكون
عمري واقف وقتها
لحظة ما روحي اتسمرت
والدمعة من عزم الألم
وقفت في عيني اتحجرت
ورفعت روحي للسما
ودعيت لربي بمظلمة
يجمعني بيه
وأضمه لو هصبح عدم
أنا لسه واقف وقتها
لحظة ما روحي اتقسمت
بين قلب يحمد ربنا
وعيون لحبك مدمنة
وآهات بتتوضى بندم
إزاي تكون عدت سنة ؟
وأنا لسه عايش في الوجع
نفس الوجع
زايد عليه شوق واجتمع
لأي لحظة تضمنا
لأي رنة لضحكتك
لطعم يشبه فرحتك
لما أفهمك من نظرتك
ما أنت أنا
والأصعب إنك موش هنا
وسايبني وحدي من سنة
معقول تكون عدت سنة
وما بيننا أصبح ألف سور
والضلمة تخطف من طريقي
ألف نور
والحزن يرسم قصتي
فوق السطور
ويعدي يوم بيعزي يوم
على خطوتك
كات زي ورد بينزرع
طول سكتك
وترش بهجة ع الجيران
صدقني غيبتك أثرت
والريحة باقية في المكان
وكأنها من وقتها
وقفت جميع الازمنة
معقول تكون عدت سنة
التعليقات مغلقة.