عصفورة شجر قلبي
شعر سيدة القصاص
في ليل البرد
والرعشة تضميني
على “حِرام “
الحنان نايمة ف
ضيا عيني
وصيف دافي
ف شتا قلبي
يراعيني
أجيبك طَبْ
منين تاني
ياست الكل ؟…
ما كنتِ بجد
فاهماني
ياعصفورة
شجر
قلبي
ياعود الفل
يا ريق الصبر
واتبعتر على
الأحزان
باساهر النجوم
عنك
وغيط الفول
وادوَّر ع “الحِرام”
الاصفر
وأبونا ” الغول “
مش انتِ كنت
ساحبة ايديه
ف ليل الخوف..؟
عشان يرقد على
كتف الطفولة
هناك
و”فُرْنِك”
اللي كان “دَايِّر”
لكل جعان
خبيز
..يرقص..على
فرحة فقير…
نشوان… على
ريحة رغيف
نعسان
وطاجن
” رز “
“وبطاطس”
” بصوص “
احساس
وفاكرة… لسة
إحساسك
وأحلى شعور…
وإيدك…
ماسكة
إيد “فاسك”
“بتعزق”
نور
وإيد تانية
بأحطابك…
بتحمي النار…
تقيدي
“وابورك”
المطفي
ترصي
“العيش”
على “مشنة”
بنات خالتي
أم عود ملفوف
“تقيسي”
البطة
لـ هنية …
وتِرْقي
“البقرة ” لـ بهية
أم “واد” غلبان
و من عِين
اللي شافت
خيرها ولا سمَّتْ
و”سامية”كمان
ياترعة…
بركة كات
مالية ديارنا بعِز
يا “طَعمَانا”
الحمام
محشي
“بكبد الوز”
يافَجر
وخيطه كان
إيدك بحب… تنِز
يا ” أُم أُمي ” يا
شَجَراية حَنان بِتْلِذ.
ولما باحس ببرودة
شتا ف روحي
فابفتكرك …ياضلاية
أمل…وحنان
.
التعليقات مغلقة.